नीलोपाटी संवाददाता
राज याक्खा,ताप्लेजुङ
ताप्लेजुङ जिल्लाको दोभान बजारमा सदाझैँ यस वर्ष पनि ऐतिहासिक ५२औँ पुसे मेला भव्य रूपमा सम्पन्न भएको छ। मेलाको विशेष आकर्षणका रूपमा आयोजना गरिएको अन्तरजिल्ला स्तरीय पुरुष भलिबल प्रतियोगिता दर्शकको उल्लेख्य उपस्थितिसहित सफलतापूर्वक सम्पन्न भएको हो।
उक्त भलिबल प्रतियोगितामा विभिन्न जिल्लाबाट आएका ५ वटा टिमको सहभागिता रहेको थियो। खेल पुस १ गतेदेखि सुरु भई आज पुस ५ गते सम्पन्न भएको हो। प्रतियोगिताअन्तर्गत आज भएको फाइनल खेलमा भोजपुर भलिबल क्लब र सभापोखरी भलिबल क्लबबीच रोमाञ्चक प्रतिस्पर्धा भएको थियो।
फाइनल खेलमा भोजपुर भलिबल क्लबले उत्कृष्ट प्रदर्शन गर्दै सभापोखरी भलिबल क्लबलाई सोझो सेटमा पराजित गर्दै उपाधि हात पारेको छ। यससँगै भोजपुर भलिबल क्लबले अघिल्लो वर्षको च्याम्पियनको उपाधि जोगाउँदै लगातार दोस्रो पटक पुसे मेलाको भलिबल च्याम्पियन बन्न सफल भएको छ।
खेलमा भोजपुर भलिबल क्लबका खेलाडी विष्णु बस्नेत ले उत्कृष्ट प्रदर्शन गरेपछि उनलाई Player of the Match घोषित गरिएको थियो। प्रतियोगिताको विजेता टोली भोजपुर भलिबल क्लबले ३ लाख रुपैयाँ नगद पुरस्कारसहित ट्रफी र प्रमाणपत्र प्राप्त गर्नेछ भने उपविजेता सभापोखरी भलिबल क्लबले १ लाख ७५ हजार रुपैयाँ नगदसहित ट्रफी र प्रमाणपत्र प्राप्त गर्नेछ।
उक्त प्रतियोगिताको प्रत्यक्ष प्रसारण MMC Club Taplejung को Facebook Page, Koshi Sports TV को YouTube Channel तथा सभापोखरी भलिबल क्लबको Facebook Page मार्फत गरिएको थियो, जसले खेललाई देश–विदेशमा रहेका दर्शकमाझ पुर्याउन महत्वपूर्ण भूमिका खेलेको थियो।
स्थानीय कला, संस्कृति र खेलकुद प्रवर्द्धनमा महत्वपूर्ण योगदान पुर्याउँदै आएको पुसे मेलाले यस वर्ष पनि दोभान बजारलाई खेलकुद र उत्सवको केन्द्रका रूपमा चिनाउन सफल भएको आयोजकले बताएका छन्।
