नीलोपाटी संवाददाता
ताप्लेजङ्, राज याक्खा
श्री सिद्धकाली माध्यमिक विद्यालयको ७०औँ वार्षिक उत्सवको अवसरमा आयोजित भलिबल प्रतियोगिताको पहिलो दिन उत्साहपूर्ण खेलहरूसहित सम्पन्न भएको छ। विभिन्न स्थानीय तहका टिमहरूको सहभागितामा सुरु भएको प्रतियोगिताले दर्शकहरूमा विशेष आकर्षण पैदा गरेको छ।
पहिलो दिनको पहिलो खेलमा आयोजक टिम र कन्काई नगरपालिकाबीच प्रतिस्पर्धा भएको थियो। खेलमा कन्काई नगरपालिकाले सशक्त र अनुशासित खेल प्रदर्शन गर्दै सोझो सेटमा जित हासिल गर्यो। यस जितसँगै कन्काई नगरपालिका भलिबल टिम सेमीफाइनलमा प्रवेश गरेको छ।
त्यसैगरी, पहिलो दिनको दोस्रो खेल हिलिहाङ र पाथिभरा याङवरकबीच सम्पन्न भयो। खेलमा पाथिभरा याङवरक टिमले उत्कृष्ट तालमेल र आक्रामक खेल प्रस्तुत गर्दै सोझो सेटमै हिलिहाङलाई पराजित गर्यो। यस जितसँगै पाथिभरा याङवरक पनि सेमीफाइनलमा प्रवेश गरेको छ। पाथिभरा याङवरकको सेमीफाइनल खेल भोलि सिदिङवा गाउँपालिकासँग हुने आयोजकले जानकारी दिएको छ।
पहिलो दिनको तेस्रो खेल फलेलुङ् र याङवरकबीच भएको थियो। प्रतिस्पर्धात्मक खेलमा फलेलुङ् टिमले निरन्तर दबाब कायम राख्दै सोझो सेटमा जित हात पार्यो र सेमीफाइनलमा आफ्नो स्थान सुरक्षित गर्यो।
प्रतियोगितामा सहभागी भए पनि पहिलो खेलमै बाहिरिन बाध्य भएका टिमहरूलाई आयोजकको तर्फबाट मायाको चिनो वितरण गरिएको थियो। यसले हार–जितभन्दा माथि उठेर खेलभावना, सम्मान र आपसी सद्भावलाई प्राथमिकता दिएको सन्देश दिएको छ।
भलिबल प्रतियोगिता २०८२ साल ८ महिना २८ गतेबाट सुरु भई १ गते फाइनल खेल हुनेछ। प्रतियोगिताको विजेता टिमले नगद १ लाख ११ हजार १ सय ११ रुपैयाँ तथा उपविजेता टिमले ५५ हजार ५ सय ५५ रुपैयाँ पुरस्कार प्राप्त गर्ने आयोजकले जनाएको छ।
