नीलोपाटी संवाददाता
राज याक्खा,ताप्लेजुङ्
२०८२/०८/१७ गते
१८ औं आत्मानन्द रन उत्साह र जोशका साथ सम्पन्न
छ। आज बिहान १०: ३० बाट सुरु भएको थियो।दमक रनबाट सहभागी भएका धावकहरूले यस वर्ष विशेष रूपमा उल्लेखनीय प्रदर्शन गर्दै श्रेष्ठ स्थान हासिल गरेका छन्। प्रतिस्पर्धात्मक वातावरणमा दमकका प्रतिभाशाली रनरहरूले आफ्नो क्षमताको दमदार परिचय दिएका छन्।
प्रतियोगितामा ओसन राईले ३४ मिनेट ३८ सेकेन्डमा दूरी पूरा गर्दै पहिलो स्थान हात पारे। सरोज सिंहले ३५ मिनेट ३९ सेकेन्डमा दौड समाप्त गर्दै दोस्रो स्थान प्राप्त गरे भने सागर नेम्बाङ ३६ मिनेट ३६ सेकेन्डको समयसहित तेस्रो स्थानमा रहे। यस्तै, याङदेब राई ३९ मिनेट ३३ सेकेन्डमा चौथो बने। उनीहरूको मेहनत र लगनले प्रतियोगितालाई अझ आकर्षक बनाएको थियो।
यद्यपि सफलता हात पारे पनि धावकहरूले आफ्ना चुनौतीहरूको पीडा पनि व्यक्त गरे। उनीहरूले विभिन्न प्रतियोगितामा सहभागी हुन जाँदा मुख्य रूपमा आर्थिक अभावले कठिनाइ हुने बताएका छन्। धेरैले सहयोगको आश्वासन दिए पनि व्यवहारमा सहयोग नपाएको उनीहरूको गुनासो छ। साथै, अन्य खेलहरूमा जस्तै दौड प्रतियोगितामा पनि पुरस्कार राशिको न्यूनता दीर्घकालीन समस्याका रूपमा देखिएको उनीहरूको धारणा छ। पुरस्कार राशि बढाइए दौडप्रति समर्पण, रुचि र सम्मान अझै बढ्ने उनीहरूको अपेक्षा छ।
दमकका धावकहरूले प्रस्तुत गरेको प्रतिभा, अनुशासन र समर्पणले यस क्षेत्रको खेलकुद विकासमा महत्वपूर्ण सन्देश दिएको छ। आगामी दिनमा उनीहरूलाई आवश्यक सहयोग, प्रोत्साहन र सुविधाको व्यवस्था गरिँदा नेपाली एथलेटिक्सको स्तरलाई उठाउन ठूलो टेवा पुग्ने निश्चित छ। २४ जना यो रनमा सहभागी बनेका थिए।
