नीलोपाटी संवाददाता
- राज याक्खा,
ताप्लेजुङ, माघ २७ गते । १६ औँ राष्ट्रपति रनिङ शिल्ड अन्तरपालिका स्तरीय प्रतियोगितामा मैवाखोला गाउँपालिका प्रथम भएको छ । ताप्लेजुङको सिदिङ्वा गाउँपालिकाको केन्द्र साब्लाखुमा सम्पन्न १६ औँ राष्ट्रपति रनिङ शिल्ड अन्तरपालिका स्तरीय प्रतियोगितामा मैवाखोला प्रथम भएको हो ।
प्रथम भए सँगै मैवाखोलाले २३ स्वर्ण, २० रजत र १२ कास्य गरी कुल ५५ पदक प्राप्त गरेको छ । आठराई त्रिवेणी गाउँपालिका दोस्रो भएको छ । आठराई त्रिवेणीले १३ स्वर्ण १३ रजत र २१ कास्य गरी जम्मा ४७ पदक आफ्नो नाममा गराउन सफल भएको छ ।
यस्तै ११ स्वर्ण, आठ रजत र २३ कास्य गरी जम्मा ४२ पदक हात पार्दै फुङलिङ नगरपालिका तेस्रो बन्न सफल भएको छ । प्रतियोगिता समन्वयको भूमिका निर्वाह गरेको सिदिङ्वा गाउँपालिका भने चौथो बनेको छ । उक्त गाउँपालिकाले नौ स्वर्ण, १२ रजत र १६ कास्य गरी जम्मा ३७ पदक आफ्नो नाममा गर्न सफल भएको छ ।
पाँचौँ बनेको मेरिङदेन गाउँपालिकाले कुल १५ पदक जित्दा चार स्वर्ण, पाँच रजत र छ कास्य प्राप्त गरेको छ । मिक्वाखोलाले तीन स्वर्ण, पाँच रजत र १७ कास्य जित्दै २५ पदक जोडी छैटौँ बनेको छ । सिरिजङ्घा गाउँपालिका प्रतियोगितामा सातौँ बनेको छ । सिरिजङ्घाले दुई स्वर्ण, एक रजत र पाँच कास्य गरि नौ पदक जितेको छ ।
एक स्वर्ण, दुई रजत र दुई काश्य गरी जम्मा पाँच पदक जितेको पाथिभरा याङ्वरक गाउँपालिका ८औं बन्न सफल भएको छ । अन्तिम तथा नवौँ बनेको फक्ताङलुङ गाउँपालिका पदक विहीन बनेको छ । गत माघ २३ बाट सुरु भएको प्रतियोगिता सोमबार सम्पन्न भएको हो ।
जिल्लाका नौ वटै पालिकाका विभिन्न विद्यालयहरू सहभागी रहेका थिए । प्रतियोगितामा कुल दुई सय ३४ पदकका लागि प्रतिसप्रधा भएको आयोजक जिल्ला खेलकुद विकास समिति ताप्लेजुङका अध्यक्ष गणेश माबोले जानकारी दिनुभयो ।
