नीलोपाटी संवाददाता
लागूऔषध ओसारपसार गर्नका लागि काठमाण्डौदेखि काँकडभिट्टा धाउने कारोबारीहरुको संख्या बढ्दै गएको छ ।
पानीटंकीबाट लागूऔषध किनेर काठमाण्डौलगायत देशका विभिन्न शहरहरुमा यहाँका कारोबारीहरुले आपूर्ति गर्दै आएका छन् भने काठमाण्डौंका कारोबारीहरु आफै पनि लागूऔषधको कारोबार गर्न काँकडभिट्टा आउने गरेका छन् । पूर्वी नाका काँकडभिट्टा लागूऔषध ओसारपसारको लागि देशकै मुख्य ट्रान्जिट पोइन्ट बनेको छ । त्योसंगै झापाको भद्रपुर नाका , झापा गाउँपालिकाको लसुना नाका , गौरीगंज नाका पनि लागूऔषध ओसारपसारका लागि सहज मानिन्छ ।
हिजो दिउँसो १.३० बजे लागूऔषध ब्युरो कार्यालय काँकरभिट्टा र इलाका प्रहरी कार्यालय काँकरभिट्टाबाट खटिएको संयुक्त प्रहरी टोलीले मेचीनगर ६ मेचीडाँडामा भारतबाट मेची खोलाको बाटो हुदैँ पैदल नेपालतर्फ आउँदै गरेका काठमाण्डौ शंखरापुर नगरपालिका वडा नं. ८ बस्ने ३२ वर्षीय रोशन कार्कीलाई लागूऔषधसहित पक्राउ गरेको छ ।
शंका लागेर चेकजाँच गर्ने क्रममा उनले लगाएको बक्स पेन्टको दाहिनेपट्टिको गोजीमा सेतो रङ्गको प्लाष्टिकको डल्लोभित्र प्लाष्टिकसहित ५३ ८०० मिलिग्राम र प्लाष्टिकबाहेक ४८ ग्राम ६० मिलिग्राम ब्राउन सुगर फेला परेको थियो । कार्कीले प्रयोग गर्ने आइफोन १६ प्रोम्याक्स र ८ हजार नगदसमेत बरामद भएको थियो । उनलाई नियन्त्रणमा लिई इलाका प्रहरी कार्यालय काँकरभिट्टामा राखिएको छ ।
यसअघि जेठ २ गते काठमाण्डौका दुईजना कारोबारी काँकडभिट्टामा लागूऔषधसहित पक्राउ परेका थिए ।
