नीलोपाटी संवाददाता
ताप्लेजुङ्,
फाल्गुन २१ गते हुने निर्वाचनका लागि राष्ट्रिय स्वतन्त्र पार्टीबाट इन्जिनियर वीरेन्द्र श्रेष्ठ ताप्लेजुङ जिल्लामा उम्मेदवारका रूपमा चुनावी मैदानमा उत्रिनु भएको छ। प्राविधिक दक्षता, इमानदार छवि र बहुआयामिक व्यक्तित्वका कारण उहाँको उम्मेदवारीले जिल्लामा उल्लेखनीय चर्चा पाएको छ।
पेशाले इन्जिनियर रहनु भएका श्रेष्ठ विकास र पूर्वाधारका विषयमा गहिरो ज्ञान राख्ने व्यक्ति हुनुहुन्छ। उहाँले विकासलाई केवल भौतिक संरचनामा सीमित नराखी दीर्घकालीन योजना, पारदर्शिता र दिगोपनासँग जोडेर हेर्नुपर्ने धारणा सार्वजनिक रूपमा व्यक्त गर्दै आउनु भएको छ। यही कारण विकासप्रति चासो राख्ने वर्गमा उहाँप्रति भरोसा बढ्दै गएको देखिन्छ।
प्राविधिक क्षेत्रसँगै श्रेष्ठ गायन क्षेत्रमा पनि परिचित नाम हुनुहुन्छ। उहाँका विभिन्न गीतहरू श्रोतामाझ लोकप्रिय बनेका छन्। सिर्जनशीलता र संवेदनशील सोचले उहाँलाई समाजका विभिन्न पक्षलाई नजिकबाट बुझ्ने व्यक्तित्वका रूपमा चिनाएको स्थानीयहरूको भनाइ छ।
सामाजिक रूपमा सरल, मिलनसार र अनुशासित स्वभावका रूपमा परिचित श्रेष्ठलाई नजिकबाट चिन्नेहरू उहाँलाई कसैलाई दुःख नदिने, स्वार्थरहित र इमानदार व्यक्ति बताउँछन्। व्यक्तिगत जीवनमा सादगी र व्यवहारमा पारदर्शितालाई प्राथमिकता दिने उहाँको छविको कदर गर्दै विभिन्न राजनीतिक धारणा राख्ने नागरिकहरू समेत सकारात्मक रूपमा हेर्न थालेका छन्।
स्थानीयस्तरमा प्राप्त प्रतिक्रियाअनुसार एमाले, नेपाली कांग्रेस, नेपाल कम्युनिस्ट पार्टीलगायत अन्य विभिन्न दलप्रति आस्था राख्ने मतदाताहरूले पनि पार्टीभन्दा माथि उठेर इमानदार र सक्षम उम्मेदवारलाई मूल्याङ्कन गर्नुपर्ने धारणा व्यक्त गरेका छन्। उनीहरूले इन्जिनियर श्रेष्ठको आचरण, सोच र क्षमतालाई आधार बनाएर समर्थन जनाउने अभिव्यक्ति दिएका छन्।
फाल्गुन २१ गते हुने निर्वाचन नजिकिँदै गर्दा, इन्जिनियर वीरेन्द्र श्रेष्ठको उम्मेदवारीलाई विचार, क्षमता र इमानदारिताका आधारमा मूल्याङ्कन गर्ने बहस ताप्लेजुङमा अझ सशक्त बन्दै गएको छ।
नीलोपाटी संवाददाता