नीलोपाटी संवाददाता
मोरङ । विद्यार्थी राजनीतिबाट आफ्नो राजनीतिक यात्रा सुरु गरेका निरज कार्की रितिजले नेपाली कांग्रेसको १५औँ महाधिवेशनमा केन्द्रीय महाधिवेशन प्रतिनिधि (युवा तर्फ) पदमा उम्मेदवारी दिएका छन्।
राजनीतिलाई नजिकबाट बुझ्ने उद्देश्यसहित विद्यार्थी राजनीतिमा प्रवेश गरेका कार्कीले स्ववियु सदस्य तथा नेपाल विद्यार्थी संघ इकाई सचिवको जिम्मेवारी सम्हाल्दै संगठनात्मक अनुभव हासिल गरेका छन्। विद्यार्थी राजनीतिबाट सुरु भएको उनको यात्रा अहिले नेपाली कांग्रेसको केन्द्रीय महाधिवेशन प्रतिनिधिको उम्मेदवारीसम्म पुगेको हो।
कार्कीले युवाको विचार, ऊर्जा र सहभागितालाई पार्टी संगठनको मूलधारमा अझ प्रभावकारी रूपमा स्थापित गर्ने उद्देश्यले उम्मेदवारी दिएको बताएका छन्। उनले युवा पुस्ताको आवाजलाई संगठनभित्र मजबुत बनाउँदै नयाँ सोच र सक्रिय नेतृत्वमार्फत पार्टीलाई थप सुदृढ बनाउन आफ्नो भूमिका केन्द्रित गर्ने बताएका छन्।
राजनीतिक तथा विद्यार्थी संगठनसँगै सामाजिक र युवा नेतृत्वमा समेत सक्रिय कार्कीले काठमाडौं जेसीज २०२४ मा उपाध्यक्ष तथा २०२५ मा कोषाध्यक्षको जिम्मेवारी निर्वाह गरेका थिए। उक्त अनुभवले संगठन व्यवस्थापन, नेतृत्व विकास तथा युवामाझ सहकार्यमा समेत उनलाई अनुभव प्रदान गरेको देखिन्छ।
मोरङ क्षेत्र नं. ४ बाट उम्मेदवारी दिएका कार्कीले आफ्नो राजनीतिक यात्रामा प्राप्त अनुभवलाई आगामी दिनमा संगठन निर्माण र युवा सहभागिता विस्तारमा प्रयोग गर्ने प्रतिबद्धता व्यक्त गरेका छन्।
उनले आफ्नो उम्मेदवारीप्रति नेता, कार्यकर्ता तथा महाधिवेशन प्रतिनिधिहरूको सुझाव, साथ, शुभेच्छा र अमूल्य मतको अपेक्षा गरेका छन्।
नीलोपाटी संवाददाता