नीलोपाटी संवाददाता
बिर्तामोड, २२ पुस । झापाको बिर्तामोडमा ५ रुपैयाँमा भरपेट खाना खान पाइने भएको छ । बिर्तामोड–५ स्थित सिटी सेन्टर नजिकै विपन्न नागरिकलाई लक्षित गर्दै सामाजिक संस्था केजीएफले ५ रुपैयाँमा भरपेट खाना खुवाउन लागेको हो । ५ रुपैयाँमा सादा खाना खान पाइने छ ।
कोही पनि भौकै नरहुन् भन्ने उद्देश्यले ५ रुपैयाँमा खाना खुवाउन लागिएको अभियानका संयोजक विक्रम सुब्बाले जानकारी दिनुभयो । खानाको स्टलको भोलि झापाका प्रमुख जिल्ला अधिकारी शिवराम गेलाल र बिर्तामोडकी नगरप्रमुख पवित्रा महतारा प्रसाईंले उद्घाटन गर्ने उहाँले बताउनुभयो ।
सबैलाई बाँच्ने अधिकार भएको र मानव कल्याणका लागि एक छाक ती गरिव निमुखालाई भन्ने नाराका साथ सोमबारदेखि खाना अभियान सञ्चालन गरिएको हो । अभियानका लागि भोलेन्टियर्सका रुपमा मिसन झापा रहेको छ । इच्छुक महानुभावले खाना खुवाउने अभियानमा स्वतस्फूर्त सहयोग गर्न सक्ने जनाइएको छ ।
मिसन झापाका संयोजक समेत रहेका माधव झाले अभियानका विषयमा प्रकाश पार्दै यो अभियानलाई सफल बनाउन आम नागरिकलाई आग्रह गरेका छन् । संस्कार, संस्कृति, खेलकुद, कृषि पशुपंक्षी मानव सेवालाई निरन्तरता दिँदै आएको केजीएफले सो अभियालाई सबैले सहयोग गरिदिन आग्रह गरेको छ । आयोजक संस्थाले आज बिर्तामोडमा पत्रकार सम्मेलन गरी अभियानका विषयमा जानकारी दिएको हो ।
