नीलोपाटी संवाददाता
झापाको कमल गाउँपालिका वडा नं २, समयगढमा आगलागी हुँदा एक घर पूर्णरुपमा जलेर नष्ट भएको छ। आज बिहान अन्दाजी ३ बजे समयगढ निवासी चन्द्र श्रेष्ठको बाँसको भाटाको टाटीबेरा र टिनको छाना भएको एकतले घरमा अचानक आगो लागेको थियो।
आगलागीका कारण घरसँगै भित्र रहेको भाडावर्तन, अन्नपात, र लत्ता-कपडा पूर्ण रुपमा जलेर नष्ट भएको छ। यस घटनामा झन्डै ३ लाख रुपैयाँ बराबरको क्षति भएको जिल्ला प्रहरी कार्यालयले जनाएको छ।
प्रहरी चौकी तोपगाछीबाट खटिएको प्रहरी टोली, स्थानीय बासिन्दा, र कमल गाउँपालिकाको दमकलको सहयोगमा बिहान ५ बजे आगो पूर्णरुपमा नियन्त्रणमा आएको छ।
