नीलोपाटी संवाददाता
किरात धर्मका महागुरु फाल्गुनन्दको १४०औं जन्मजयन्ती आइतबार नेपालमा विविध कार्यक्रमहरूको आयोजना गरेर मनाइँदैछ। किरात धर्म, भाषा, लिपि, संस्कार, संस्कृति र समाज सुधारमा उनले पुर्याएको योगदानलाई सम्मानसहित स्मरण गरिँदैछ।
महागुरु फाल्गुनन्दले समाज सुधारका लागि १९८८ साल वैशाख २४ गते ‘सत्य धर्म मुचुल्का’ जारी गरेर समाजलाई नयाँ दिशा प्रदान गरेका थिए। यस संहितामा विवाह संस्कार, पूजा विधि, मद्यपान, मासु सेवन जस्ता सुधारका पक्षहरूलाई समेटिएको थियो, जसले समाजलाई प्रगतिशील र समृद्ध बनाउने बाटो देखाएको थियो।
फाल्गुनन्दले आफ्नो जीवन समाज सुधार र संस्कृति संरक्षणमा समर्पित गरे। किरात धर्मको उत्थानमा उनको योगदान उल्लेखनीय रह्यो, यद्यपि सुधारवादी विचारधाराका कारण उनलाई देशद्रोहीको अभियोग खेप्नुपरेको थियो। २००५ सालमा उनको निधन भए पनि २०६६ मङ्सिर १६ गते उनलाई राष्ट्रिय विभूति घोषणा गर्दै नेपाल सरकारले उनको योगदानको उच्च कदर गरेको थियो।
उनको जयन्तीका अवसरमा ताप्लेजुङ, तेह्रथुम, पाँचथर, इलाम, र झापा जस्ता पूर्वी नेपालका जिल्लाहरूमा विविध कार्यक्रमहरू आयोजना गरिएको छ। यस अवसरमा कोशी प्रदेश सरकारले सार्वजनिक बिदा घोषणा गरेको छ, जसले महागुरु फाल्गुनन्दप्रतिको सम्मानलाई अझ विशेष बनाएको छ।
