नीलोपाटी संवाददाता
झापाको कमल गाउँपालिका स्थित केर्खामा भएको दुर्घटनापछि अवरुद्ध भएको पूर्वपश्चिम राजमार्ग करिब १२ घण्टापछि पुनः सुचारु भएको छ। हजुरबुवा र नातिनीको दर्दनाक दुर्घटनामा मृत्यु भएपछि स्थानीय आक्रोशित भएका थिए र स्थिति नियन्त्रणमा लिन प्रहरीलाई दर्जनौं सेल अश्रुग्यास प्रहार गर्नुपर्ने भएको थियो।
पीडित पक्षसँग ४ बुँदे सहमति भएपछि राजमार्ग पुनः खुलाइएको हो। गएराति ९ बजेदेखि बिहान २:३० बजेसम्म कमल–३ स्थित वडाध्यक्ष अग्नी कोइरालाको घरमा सर्वपक्षीय बैठक भएको थियो। बैठकमा पीडित पक्षलाई अधिकतम क्षतिपूर्ति दिलाउने, दोषी चालकलाई कारबाही गर्ने, त्रिपक्षीय सहमति कार्यान्वयन गर्ने, र कानुनी प्रक्रिया अगाडि बढाउने निर्णय भएको छ।
प्रहरीले बिहान ५ बजे मृतकहरुको शव पोस्टमार्टमका लागि दमक अस्पताल पठाएको छ। काँकडभिट्टाबाट काठमाडौतर्फ जाँदै गरेको रात्रिबसले इलेक्ट्रिक साइकललाई ठक्कर दिँदा दुर्घटना भएको थियो। सोही घटनाले आक्रोशित स्थानीयले प्रहरी चौकी र बसलाई तोडफोड तथा आगजनी गरेका थिए।
जिल्ला प्रहरी कार्यालयका प्रवक्ता डीएसपी कृष्णकुमार चन्दका अनुसार, अहिले स्थिति सामान्य रहेको छ। यस घटनामा नेपाल प्रहरी र सशस्त्र प्रहरीका ५-५ जना घाइते भएका छन्।
यो घटनाले स्थानीय समाजमा ठूलो आक्रोश र दुःखको स्थिति निम्त्याएको छ। अहिले राजमार्ग सुचारु भएसँगै जनजीवन सामान्य अवस्थामा फर्किरहेको छ।
