नीलोपाटी संवाददाता
इलाम जिल्लाको रोङ गाउँपालिका-५ स्थित चिसापानीमा रहेको किरात पार्क नयाँ पर्यटकीय गन्तव्यको रूपमा विकास भइरहेको छ। प्राकृतिक सौन्दर्यता र किरात सभ्यता झल्काउने सांस्कृतिक महत्वका कारण यस पार्कले स्थानीय र बाह्य पर्यटकहरूलाई आकर्षित गर्न थालेको छ।
किरात सभ्यताको ऐतिहासिक पक्षलाई उजागर गर्ने विभिन्न संरचनाहरू, हरियाली वातावरण, र धार्मिक तथा सांस्कृतिक पर्यटनको प्रबर्धनले यो पार्क विशेष स्थान बनाउँदै गएको छ। किरात सभ्यताको धरोहरको रूपमा चिनिएको यस पार्कमा आउने पर्यटकहरूको संख्या दिनानुदिन बढिरहेको छ।
पार्कमा विभिन्न सांस्कृतिक कार्यक्रमहरूको आयोजना गर्ने योजना र पर्यटकलाई थप सुविधाहरू प्रदान गर्नका लागि विस्तार योजना पनि अघि बढाइएको छ। किरात सभ्यताको धनी यस क्षेत्रमा धेरै किरात समुदायको बसोबास छ, जसको पहिचान र सम्मान स्वरूप यो पार्क स्थापना गरिएको हो।
न्यून बजेटमा तयार पारिएको यो पार्कले किरात सभ्यताको ऐतिहासिक र सांस्कृतिक संरचना झल्काउन सफल भएको छ। पछिल्लो समय यहाँ आउने पर्यटकहरूको भीड दिनानुदिन बढ्दै गएको छ, जसले यो पार्कलाई इलामको प्रमुख पर्यटकीय आकर्षणको रूपमा स्थापित गराइरहेको छ।
