नीलोपाटी संवाददाता
राज याक्खा
राष्ट्रिय स्वतन्त्र पार्टी (रास्वपा)का सभापति रवि लामिछानेको आधिकारिक फेसबुक पेज आज बिहानदेखि अचानक गायब भएको छ। निर्वाचनको मौन अवधि सुरु हुनुअघि सहकारी प्रकरणबारे आक्रामक अभिव्यक्ति दिएका लामिछानेको पेज नदेखिएपछि सामाजिक सञ्जालमा विभिन्न अड्कलबाजी सुरु भएको छ।
यसैबीच, लामिछानेको सचिवालयले विज्ञप्ति जारी गर्दै पेजमाथि बाह्य व्यक्तिहरूले पटक–पटक ह्याक गर्ने प्रयास गरेको जनाएको छ। सोही कारण सुरक्षामा जोखिम देखिएपछि फेसबुकको मातृसंस्था Meta Platforms (मेटा) ले नै पेजलाई अस्थायी रूपमा ‘लक’ गरिदिएको दाबी गरिएको छ। सचिवालयका अनुसार पेज पूर्ण रूपमा सुरक्षित नभएसम्म कुनै पनि नयाँ पोस्ट सार्वजनिक गरिने छैन।
विज्ञप्तिमा शंकास्पद लिंक, नक्कली पेज वा भ्रामक सामग्रीबाट सचेत रहन समर्थक तथा सर्वसाधारणलाई आग्रह गरिएको छ। साथै, मेटाको सुरक्षा टोलीसँग समन्वय गरेर पेज यथाशीघ्र पुनः सञ्चालनमा ल्याउने प्रयास भइरहेको जानकारी पनि दिइएको छ।
पेज कहिलेसम्म पुनः सुचारु हुन्छ भन्नेबारे स्पष्ट समयसीमा भने दिइएको छैन। पछिल्लो घटनाले निर्वाचनको संवेदनशील समयमा सामाजिक सञ्जाल सुरक्षाको विषयलाई फेरि एकपटक बहसको केन्द्रमा ल्याएको छ।
नीलोपाटी संवाददाता