नीलोपाटी संवाददाता
झापा, २४ कात्तिक । झापाको शिवसताक्षीस्थित दुधे रंगशालामा जारी एलभिडी झापा महिला गोल्डकप फुटबल प्रतियोगिताको उपाधिका लागि दुई विभागीय टोली एपिएफ फुटबल क्लब र नेपाल पुलिस क्लबले आआफ्नो दाबी प्रस्तुत गरेका छन् ।
फाइलन खेलको पूर्वसन्ध्यामा आइतबार रंगशालामा परिसरमा आयोजित ‘प्रि–म्याच कन्फ्रेन्स’मा दुवै टिमले उपाधिमा आआफ्नो दाबी प्रस्तुत गरेका हुन् । दुवै टोलीका प्रशिक्षक र कप्तानले आफ्नो टोली उपाधि रक्षाका लागि रूपमा तयार रहेको बताएका छन् ।
“हाम्रो टोलीले अहिलेसम्म फाइनलमा हार व्यहोरेको छैन”, एपिएफका प्रशिक्षक जिवेश पाण्डेले भन्नुभयो, “यसपटक पनि हामी उपाधि रक्षा गर्नेछौं ।”
एपिएफकी कप्तान अनिता बस्नेतले झापाको मैदानमा पुलिसलाई रोक्दै अर्को उपाधि थप्ने बताउनुभयो । खेल मैदान र दर्शकको उपस्थिति उत्साहजनक रहेको बताउनुहुँदै उहाँले जीत–हार स्वाभाविक भए पनि जीत निकाल्नमै टिमको ध्यान केन्द्रीत हुने उल्लेख गर्नुभयो ।
नेपाल पुलिस क्लबका प्रशिक्षक भोला सिलवालले एपिएफलाई पाखा लगाउँदै उपाधि रक्षा गर्ने दाबी गर्नुभयो । रेखा पौडेल र पूजा राना मगरको तालमेललाई टोलीको मुख्य बल रहेको बताउनुहुँदै उहाँले भन्नुभयो, “हाम्रो टोलीमा धेरैपछि रेखा र पूजा सँगै खेलिरहेका छन् । अन्य खेलाडीले पनि राम्रो प्रदर्शन गरिरहेका छन् । त्यसैले यसपटक हामी एपिएफलाई हराउँदै उपाधि जित्नेछौँ ।”
“हामीले विगतमा धेरैपटक एपिएफसँग पराजय व्यहोरेका छौँ, तर यसपटक बदला लिँदै ट्रफी लिएर जानेछौँ”, पुलिसकी कप्तान अमृता जैशीले भन्नुभयो, “विगतका पराजयको बदला लिँदै झापाको दर्शकका सामु पुलिसले उत्कृष्ट खेल देखाउनेछ ।”
यसअघिका खेलमा टिकट दर रू एक सय र रू दुई सय रहेकोमा आयोजक समितिले दर्शकका लागि टिकट दर सामान्यतर्फ रू ३००, रू ५०० र भिआइपीतर्फ रू एक हजार तोकेको छ ।
प्रतियोगिताको विजेताले रू १० लाख १० हजार, उपविजेताले रू पाँच लाख र सर्वोत्कृष्ट खेलाडीले रू एक लाख ५० हजार प्राप्त गर्नेछन् । प्रतियोगिताका उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, उत्कृष्ट प्रशिक्षक र उच्च गोलकर्ताले जनही रू २५ हजार प्राप्त गर्ने आयोजकले जनाएको छ । हरेक खेलको प्लेयर अफ द म्याचलाई रू १५ हजार रुपैयाँ र ट्रफी प्रदान गरिँदै आएको छ ।
