नीलोपाटी संवाददाता
सुरेन्द्र खरेल, पाँचथर
फिदिम, जेठ २६ — पाँचथर प्रहरीले फिदिम नगरपालिका–२ बाट प्रतिबन्धित खैरो हेरोइनसहित पाँच जनालाई पक्राउ गरेको छ।
फिदिम–२ स्थित एक घरमा लागुऔषध कारोबार हुने गोप्य सूचनाका आधारमा प्रहरीले छापा मारेको थियो। जिल्ला प्रहरी कार्यालय पाँचथरका सूचना अधिकारी ख्यामराज घिमिरेका अनुसार, सो क्रममा ३ ग्राम ५१० मिलिग्राम खैरो हेरोइन बरामद गरिएको हो।
प्रहरीले पक्राउ परेका व्यक्तिहरूको नाम अनुसन्धानमा प्रभाव पर्न सक्ने भन्दै हाल सार्वजनिक गरेको छैन। उनीहरूलाई जिल्ला प्रहरी कार्यालयको हिरासतमा राखी थप अनुसन्धान भइरहेको प्रहरीले जनाएको छ।
