धार्मिक स्थलको संरक्षणमा जुटे मेयर चौधरी, हरिनगरामा अष्टजामको विधिवत सुरुवात

वैशाख २६, लहान — सिराहा जिल्लाको लहान नगरपालिकाका मेयर महेश प्रसाद चौधरी पछिल्लो समयमा धार्मिक र सांस्कृतिक सम्पदाको संरक्षण र प्रवर्द्धनमा विशेष ध्यान दिन थालेका छन् ।

नगर क्षेत्रभित्र रहेका मठ-मन्दिर, देवालय, आर्यघाटलगायतका धार्मिक तथा पर्यटकीय स्थलहरूको समुचित व्यवस्थापन र निर्माणमा सक्रियता देखाउँदै उहाँ धार्मिक व्यक्तित्वका रूपमा चर्चित हुँदै जानुभएको छ ।

धार्मिक आस्थामा विश्वास राख्ने आम जनताको मागलाई प्राथमिकतामा राख्दै मेयर चौधरीले लहान नगरपालिकाको विभिन्न वडामा रहेका धार्मिक स्थलहरूको सरसफाइ, पुनःनिर्माण र विस्तार कार्यलाई तीव्रता दिएका छन् । यसै क्रममा, लहान नगरपालिका–२० स्थित हरिनगरा गाउँमा अवस्थित सन्यासी बाबा डिहवार स्थानमा कम्पाउण्ड वाल निर्माण कार्य सम्पन्न गरी विधिवत रूपमा अष्टजाम प्रारम्भ गरिएको छ ।

अष्टजाम सुरुवात समारोहमा नगर प्रमुख महेश प्रसाद चौधरी स्वयं सहभागी हुनुका साथै वडा अध्यक्ष गणेश चौधरी, स्थानीय बुद्धिजीवी, समाजसेवी तथा श्रद्धालुहरूको बाक्लो उपस्थिति रहेको थियो । धार्मिक विधिअनुसार सम्पन्न भएको उक्त कार्यक्रममा सन्यासी बाबाको महत्व, डिहवार स्थानको ऐतिहासिक तथा आध्यात्मिक योगदानबारे समेत छलफल गरिएको थियो ।

मेयर चौधरीले कार्यक्रममा सम्बोधन गर्दै भन्नुभयो, “नगरभित्र रहेका सम्पूर्ण धार्मिक स्थलहरू हाम्रो संस्कृति, सभ्यता र पहिचानका आधार हुन् । तिनको संरक्षण र सम्बर्द्धन गर्नु हाम्रो कर्तव्य हो ।” उहाँले आगामी दिनमा पनि धार्मिक पर्यटन प्रवर्द्धन तथा आध्यात्मिक चेतनाको विकासमा स्थानीय सरकारको तर्फबाट निरन्तर सहयोग रहने प्रतिबद्धता जनाउनु भयो ।

लहान नगरपालिकाको नेतृत्व सम्हालेदेखि नै सामाजिक सद्भाव, सांस्कृतिक जगेर्ना तथा नगरको समग्र विकासमा लागिपर्नु भएका मेयर चौधरीको यस कदमले नगरवासीबीच सकारात्मक सन्देश दिएको छ । धार्मिक स्थलहरूको संरक्षण तथा विकासले लहानलाई धार्मिक पर्यटनको केन्द्रका रूपमा स्थापित गर्न सक्ने विश्वास स्थानीयवासीहरूले व्यक्त गरेका छन् ।

यसरी, एक कुशल प्रशासकका साथै धार्मिक व्यक्तित्वका रूपमा स्थापित हुँदै जानुभएका मेयर महेश प्रसाद चौधरीको नेतृत्वमा लहान नगरपालिका धार्मिक र सांस्कृतिक जागरणको दिशामा अघि बढिरहेको छ ।