नीलोपाटी संवाददाता
झापाको दमक नगरपालिका वडा नम्बर १० स्थित सेतिमारी पुलमुनि बोराभित्र फेला परेको महिलाको शवको पहिचान खुलेको छ।
मृतक महिला दमक नगरपालिका वडा नं. ८ बसन्त टोल बस्ने २१ वर्षीया रोमा भन्ने रमा तिवारी रहेको पुष्टि भएको छ। हातमा रहेको ट्याटु र हुलियाका आधारमा मृतकका बुबा नारायण तिवारी र आमा मुना तिवारीले इलाका प्रहरी कार्यालय दमकमा पुगेर शवको सनाखत गरेका हुन्। पारिवारिक स्रोतका अनुसार रमा गत जेठ १३ गते राति अन्दाजी ९:३० बजेको समयमा घरबाट आफूखुसी निस्किएकी थिइन् र त्यसपछि घर फर्किएकी थिइनन्।
हत्या गरेर बोरामा प्याक गरी फालिएको अवस्थामा शव भेटिएकाले घटनालाई अत्यन्तै शङ्कास्पद रूपमा हेरिएको छ। घटनाको वास्तविकता पत्ता लगाउन इलाका प्रहरी कार्यालय दमक र जिल्ला प्रहरी कार्यालय झापाको टोलीले सुक्ष्म अनुसन्धान गरिरहेको छ।
