नीलोपाटी संवाददाता
झापा । झापाको दमकमा मोटरसाइकल अनियन्त्रित भई दुर्घटना हुँदा चालकको मृत्यु भएको छ ।
कमल गाउँपालिका-६ निवासी ३८ वर्षीय विनोद राईको दुर्घटनामा मृत्यु भएको जिल्ला प्रहरी कार्यालय झापाले जनाएको छ
झापा जिल्लाको दमक नगरपालिका–७ लालिगुराँस टोलस्थित भित्री सडक खण्डमा भएको सवारी दुर्घटनामा एक जनाको मृत्यु भएको छ।
मंसिर ८ गते रातिको समयमा हनुमान मन्दिरतर्फबाट रतुवा पुलतर्फ जाँदै गरेको बागमती प्रदेश ०२–०१७ प ३३४४ नम्बरको २२० सीसी पल्सर मोटरसाइकल दुर्घटनामा परेको हो। मोटरसाइकल सडकको पूर्वपट्टि पानी जमेको ढलको नालीभित्र पसेर दुर्घटना भएको प्रारम्भिक जानकारी प्राप्त भएको छ।
दुर्घटनामा मोटरसाइकल चालक झापा जिल्ला कमल गाउँपालिका–६ निवासी खङबहादुर राईका ३८ वर्षीय छोरा विनोद राई मृत अवस्थामा फेला परेका थिए।
घटनाबारे जानकारी प्राप्त हुनासाथ इलाका प्रहरी कार्यालय दमकबाट प्रहरी नायब उपरीक्षक किशोर लम्सालको कमाण्डमा प्रहरी टोली घटनास्थलमा खटिएको थियो। हाल घटनासम्बन्धी थप अनुसन्धान तथा कानुनी प्रक्रिया अगाडि बढाइएको प्रहरीले जनाएको छ।
