नीलोपाटी संवाददाता
राज याक्खा,
ताप्लेजुङ, सिदिङ्वा — सिदिङ्वा गाउँपालिकामा आज १८औँ गाउँपालिका स्तरीय अन्तर विद्यालय राष्ट्रपति रनिङशील प्रतियोगिता भव्य रूपमा सुरु भएको छ। सोही अवसरमा लैङ्गिक हिंसा विरुद्धको १६ दिने राष्ट्रिय अभियानको समेत औपचारिक रूपमा उद्घाटन गरिएको छ।
उद्घाटन समारोहका प्रमुख अतिथि गाउँपालिकाका अध्यक्ष मानबहादुर राई, विशिष्ट अतिथि कृष्णकुमारी कडरिया (बन्दना) तथा अतिथिका रूपमा जिल्ला खेलकुद समितिका अध्यक्ष गणेश माबो सहित गाउँपालिकाका १ देखि ७ नम्बर वडाध्यक्षहरूको उल्लेखनीय उपस्थिति रहेको थियो।
कार्यक्रममा स्वागत मन्तव्यसँगै लैङ्गिक हिंसा विरुद्ध सामूहिक स्वर उठाउँदै अभियानको औपचारिक शुभारम्भ गरिएको थियो। कार्यक्रममा गाउँपालिका भरिका विद्यालयका विद्यार्थीहरूले विभिन्न खेलकुद प्रतिस्पर्धामा उत्साहपूर्वक सहभागिता जनाएका छन्।
यस वर्षको राष्ट्रपति रनिङशील प्रतियोगिता हालै निर्माण सम्पन्न सिदिङ्वा रङ्गशालामै आयोजना हुने भएका कारण खेलकुद वातावरण थप उत्साहपूर्ण बनेको छ। आजको सम्पूर्ण कार्यक्रमको सञ्चालन शिक्षा, युवा तथा खेलकुद शाखाका प्रमुख बद्रीप्रसाद सिटौलाले गर्नुभएको थियो।
