नीलोपाटी संवाददाता
झापा, १२ कात्तिक । झापाको दमक नगरपालिका–२ स्थित पाङ्गिनी चोकमा गएराति यात्रुबाहक बस दुर्घटना हुँदा एक जनाको मृत्यु भएको छ । उक्त दुर्घटनामा २१ जना घाइते भएका छन् ।
दमकबाट मोरङको टाडीतर्फ जाँदै गरेको करिब ३५ जना सवार बा २ ख १९८३ नम्बरको यात्रुबाहक बस मंगलबार राति ११ः५५ अनियन्त्रित भई सडकको नालीमा पल्टिँदा बसमा सवार मोरङ मिक्लाजुङ गाउँपालिका–३ का ३६ वर्षीय भीमबहादुर मगरको उपचारको क्रममा आम्दा अस्पताल खरखरेमा मृत्यु भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक खगेन्द्रबहादुर खड्काले जानकारी दिनुभयो ।
घाइते २१ जनामध्ये मोरङ मिक्लाजुङ–३ की १७ कि सपना श्रेष्ठबाहेक २० जना आज बिहान दमकस्थित आम्दा अस्पताल खरखरेबाट उपचारपछि डिस्चार्ज भएका छन् । प्रहरीले बस चालक मोरङ मिक्लाजुङ–३ का ३९ वर्षीय भक्तबहादुर दर्जीलाई नियन्त्रणमा लिएको छ ।
दुर्घटनामा मोरङ मिक्लाजुङ–३ की सीता मगर, उनको छोरा योगेश मगर, सोही स्थानका विपिन श्रेष्ठ, नन्दमाया मगर, आशिन लिम्बू, रामकुमारी मगर, रोनिशा दर्जी, टंक बहादुर गुरुङ, साजन श्रेष्ठ, बिष्णु कुमारी लिम्बू, निकेश भुजेल, शिशिर राई, प्रेम रसाइली, रुपा रसाइली, सन्दिप रसाइली, मिक्लाजुङ–६ का राजन श्रेष्ठ, सोही स्थानकी एन्जिला, पुनम मगर र अनुषा मगर घाइते भएका थिए ।
