नीलोपाटी संवाददाता
काभ्रेपलाञ्चोक, ११ कात्तिक । बीपी राजमार्ग अन्तर्गत सिन्धुली जिल्लाको सुनकोशी गाउँपालिका–६ चैनपुरमा मंगलबार बिहान भएको कार दुर्घटनामा एक जनाको मृत्यु भएको छ भने दुई जना घाइते भएका छन्।
बा ७ च ७५५४ नम्बरको कार विराटनगरबाट काठमाडौंतर्फ जाँदै गर्दा अनियन्त्रित भई सडकबाट करिब ४२ फिट तल खसेर दुर्घटना भएको हो। दुर्घटनामा परी मोरङको विराटनगर उपमहानगरपालिका–१७ निवासी ६५ वर्षीय ओमबहादुर अर्जेलको मृत्यु भएको जिल्ला प्रहरी कार्यालय सिन्धुलीका प्रमुख लालध्वज सुवेदीले जानकारी दिए।
मृतक अर्जेल स्वयं कार चालक थिए। दुर्घटनाको समयमा कारमा उनकी श्रीमती ४९ वर्षीया सुनिता अर्जेल र ३१ वर्षीय छोरा निशान्त अर्जेल पनि सवार थिए। दुर्घटनामा सुनिता गम्भीर घाइते भएकी छन् भने निशान्तको अवस्था मध्यम रहेको प्रहरीले जनाएको छ।
घाइतेहरूलाई प्रारम्भिक उपचारका लागि खाल्टेस्थित आत्मीय सामुदायिक अस्पतालमा लगिएको थियो। त्यहाँबाट थप उपचारका लागि धुलिखेल अस्पताल पठाइएको छ।
