नीलोपाटी संवाददाता
गाजा — इजरायल र हमासबीच जारी युद्धले गाजामा मृतकको संख्या ५० हजार नाघेको गाजाको स्वास्थ्य मन्त्रालयले जनाएको छ। सन् २०२३ को अक्टोबर ७ मा हमासले दक्षिणी इजरायलमा आक्रमण गरेपछि सुरु भएको युद्धमा हालसम्म १ लाख १३ हजार २७४ जना घाइते भएका छन्।
मन्त्रालयका अनुसार मृत्यु हुनेहरूमध्ये धेरैजसो महिला र बालबालिका छन्। हजारौं मानिस अझै भग्नावशेषमुनि पुरिएको शंका गरिँदैछ, जसले वास्तविक मृतक संख्या अझै बढ्न सक्ने संकेत गर्छ।
आइतबार राति इजरायली रक्षा बल (IDF) ले खान युनिसस्थित नासेर मेडिकल कम्प्लेक्समा आक्रमण गरेको छ। इजरायली सेनाले हमासको एक प्रमुख सदस्यलाई निशाना बनाइएको दाबी गरे पनि स्थानीय बासिन्दाले आम सर्वसाधारणको ज्यान जोखिममा परेको भन्दै चिन्ता व्यक्त गरेका छन्।
दुई महिनासम्मको युद्धविराम भंग भएपछि इजरायलले पुनः आक्रमण सुरु गरेको हो। मंगलबार भएको हवाई आक्रमणमा मात्रै ४०० भन्दा बढी प्यालेस्टिनीको ज्यान गएको हमासले जनाएको छ। हमासले यो आक्रमणलाई युद्धविराम सम्झौताको “गम्भीर उल्लंघन” भनेको छ।
इजरायली अधिकारीहरूले आगामी दिनहरूमा युद्ध अझ तीव्र हुन सक्ने चेतावनी दिएका छन्। गाजाका बासिन्दा खाद्यान्न, पिउने पानी र औषधिको चरम अभावमा छन्। अस्पतालहरू ध्वस्त छन्, उपचार सामग्रीको अभावमा घाइतेहरूको उचित उपचार हुन सकेको छैन।
युद्धको सुरुवातमा हमासले इजरायलको दक्षिणी क्षेत्रमा हमला गरी १,२०० इजरायली र विदेशी नागरिकको हत्या गरेको थियो। सो क्रममा २५१ जनालाई बन्धक बनाइएको थियो। त्यसको जवाफमा इजरायलले गाजामा व्यापक सैन्य कारबाही थालेको हो।
युद्धले गाजाको स्वास्थ्य प्रणाली पूर्ण रुपमा ध्वस्त बनाएको छ भने सामान्य जनजीवन अत्यन्तै कठिन भएको छ। संयुक्त राष्ट्रसंघले पनि मृतकमा महिला र बालबालिकाको संख्या अत्यधिक रहेको पुष्टि गरेको छ। इजरायली सेनाले नागरिक क्षति कम गर्ने प्रयास जारी रहेको बताएको भए पनि गाजाको मानवीय अवस्था दिनप्रतिदिन बिग्रँदै गएको छ।
Abin Meyangbo