नीलोपाटी संवाददाता
इलाम, नेपाल – इलाममा अलैंचीको मूल्यले नयाँ उचाइ लिएको छ। हाल उच्च गुणस्तरीय अलैंचीको प्रतिमन (४० किलो) मूल्य १,१०,००० रुपैयाँ पुगेको छ, जुन १२ वर्षयताकै उच्च हो। यस मूल्य वृद्धिले इलामका किसानहरूलाई उत्साही बनाएको छ र उनीहरूको अलैंची उत्पादनमा नयाँ उचाइको संभावना सिर्जना भएको छ।
अलैंचीको मूल्यमा वृद्धिका कारण किसानहरूको मनोबल उच्च भएको छ। माइमझुवा गाउँका किसान गिरिराज खनालले भने, “अलैंची खेतीले विदेश जानुपर्ने बाध्यता हटाएको छ।” उनले पुराना बगानलाई मेटेर नयाँ बगान विस्तार गर्दै आफ्नो उत्पादन दोब्बर बनाएको अनुभव साझा गरे।
अलैंचीको मूल्यमा उल्लेखनीय वृद्धी
२०२२-२०२३ वर्षमा अलैंचीको मूल्य प्रतिमन ३२,००० रुपैयाँ थियो, जुन २०८० सालमा ६०,००० रुपैयाँ पुगेको थियो। अहिले भने यो मूल्य १,१०,००० रुपैयाँ पुगेको छ। यो वृद्धि कृषकहरूको लागि ठूलो लाभको संकेत हो।
निर्यात र बृद्धि
चालु आर्थिक वर्षको मङ्सिरसम्ममा करिब ३ अर्ब ४५ करोड रुपैयाँ बराबरको २० लाख किलो अलैंची निर्यात भइसकेको छ। मेची भन्सार कार्यालयका अनुसार, इलामका विभिन्न बजारहरू – बिब्ल्याँटे, फिक्कल, र नयाँबजारमा अलैंचीको कारोबार सक्रिय छ।
किसानहरूको सक्रियता र बगान विस्तार
अलैंचीको मूल्य उच्च भएसँगै किसानहरू बगान विस्तार र बिरुवा उत्पादनमा सक्रिय भएका छन्। यसले अलैंची खेतीको विकास र देशभरि यसको बिस्तारलाई गति दिएको छ। हाल, नेपालमा १७,००० हेक्टर जमिनमा अलैंची खेती भइरहेको छ, जसले भविष्यमा थप कृषकहरूको जीवनस्तर सुधार्नमा मद्दत पुर्याउने अपेक्षा गरिएको छ।
