नीलोपाटी संवाददाता
माइजोगमाई (इलाम)– माइजोगमाई–५, शिरिसे माविको खेल मैदानमा सञ्चालित दोस्रो सामुदायिक परोपकार फुटबल प्रतियोगिताको उपाधि ज्योति स्पोर्टिङ क्लबले जितेको छ ।
आज भएको फाइनलमा सुनौलो फुटबल क्लब माइजोगमाई ४ लाई ६/२ गोलान्तरले पराजित गर्दै ज्योतिले उपाधि उचालेको हो ।
पहिलो हाफमा ३ गोल गरेको ज्योतिले दोस्रो हाफ थप ३ गोल गरेको थियो । सुनौलो फुटबल क्लबले पहिलो हाफमा १ गोल गरेको थियो, दोस्रो हाफमा अर्काे थप्यो ।
दोस्रो हाफ दबाबमा राखेको ज्योतिले थप ३ गोल गरेको थियो । ज्योतिको तर्फबाट टिम कप्तान जुयल राईले दुई, सचिन राईले १ र लभकुश राईले ह्याट्रिक गरे ।
उपाधि जितेसँगै ज्योतिले नगद ६१ हजार एक सय ६१, आकर्षक ट्रफी, मेडल र प्रमाणपत्र प्राप्त गरेको छ । उपविजेता सुनौलोले नगद ४१ हजार एक सय ४१, ट्रफी, मेडल र प्रमाणपत्रमा चित्त बुझायो ।
उदयीमान खेलाडी सुनौलो फुटबलका बेनुप देवान, उत्कृष्ट डिफेन्डर ज्योतिका सागर न्यौपाने, उत्कृष्ट गोलरक्षक ज्योतिका रोजन राई, म्यान अफ द म्याच ज्योतिका लबकुश राई र सर्वाधिक गोलकर्ता ज्योतिका जुयल राई घोषित भए ।
कात्तिक ९ मा प्रतियोगिता सुरु भएको थियो ।
