नीलोपाटी संवाददाता
सुर्खेतको बराहतालमा बिहीबार बिहान भएको यात्रुबाहक गाडी दुर्घटनामा एक जनाको मृत्यु भएको छ र पाँच जना घाइते भएका छन्। कर्णाली प्रदेश ०२२१ ख १०१४ नम्बरको एसएमल गाडी जुम्लाबाट सुर्खेततर्फ जाँदै गर्दा बराहताल गाउँपालिका–८ हुड्केमा दुर्घटनामा परेको हो।
दैलेखको ठाँटीकाँध गाउँपालिका–४ का ३५ वर्षीय दीपक शाही गम्भीर घाइते भएका थिए। उनलाई तत्काल उपचारका लागि प्रदेश अस्पताल सुर्खेत पुर्याइएको थियो, जहाँ चिकित्सकहरूले मृत घोषणा गरे। दुर्घटनामा अन्य पाँच जना घाइते भएका छन्, जसको अवस्था सामान्य रहेको छ। घाइतेहरूको कर्णाली केयर अस्पतालमा उपचार भइरहेको छ।
दुर्घटनामा गाडीमा बच्चासहित २९ जना यात्रु सवार थिए। तीव्र गतिमा रहेको गाडी अनियन्त्रित भई सडक छेउमा पल्टिएको प्रहरीको अनुमान छ।
जिल्ला प्रहरी कार्यालय सुर्खेतका प्रमुख प्रहरी निरीक्षक वकिल सुनारले घाइतेहरूको अवस्था सामान्य रहेको जानकारी दिएका छन्। दुर्घटनाका कारण र गाडीको स्थितिको थप अनुसन्धान भइरहेको छ।
