नीलोपाटी संवाददाता
झापा, झापाको मेचीनगर–१३ चारआली बजारस्थित लक्ष्मी डिपार्टमेन्ट अगाडि रहेको नेपाल टेलिकमको पोलबाट केबल चोरी गर्दै गरेका दुई जनालाई प्रहरीले पक्राउ गरेको छ ।
जिल्ला प्रहरी कार्यालय झापाका अनुसार सोमबार टेलिकमको करिब ३५ मिटर केबल काटेर चोरी गरिरहेको अवस्थामा प्रहरी चौकी चारआलीबाट खटिएको गस्ती टोलीले उनीहरूलाई नियन्त्रणमा लिएको हो । पक्राउ पर्नेमा मेचीनगर–६ का २३ वर्षीय संगम शेर्पा र मेचीनगर–१५ का २१ वर्षीय मणिराज राजवंशी रहेका छन् ।
प्रहरीले उनीहरूको साथबाट करिब ३५ मिटर केबल, दुई थान ह्याक्सो ब्लेड र एक थान तार कटर बरामद गरेको जनाएको छ । घटनामा संलग्न दुवै जनाविरुद्ध चोरी सम्बन्धी कसुरमा मुद्दा दर्ता गरी झापा जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको प्रहरीले जनाएको छ ।
