नीलोपाटी संवाददाता
ताप्लेजुङ, पाथीभरा क्षेत्रमा केवलकार निर्माणको विरोधमा भएको प्रदर्शनका क्रममा प्रहरीले गोली चलाउँदा दुईजना गम्भीर घाइते भएका छन्। शनिबार बेलुकी भएको झडपका क्रममा गोली लागेर यमबहादुर लिम्बू र धर्मान पालुङ्वा घाइते भएका हुन्। घाइते दुवैजनाको ताप्लेजुङ जिल्ला अस्पतालमा उपचार भइरहेको छ।
केबलकार विरोधका कारण तनावपूर्ण अवस्था
पाथीभरा क्षेत्रमा केवलकार निर्माणका लागि मंगलबारबाट सुरु भएको कामको विरोधमा ‘नो केबलकार समूह’ले आन्दोलन चलाइरहेको छ। उनीहरूको दाबी छ कि केवलकार बनेमा पाथीभरा क्षेत्रको धार्मिक र सांस्कृतिक पहिचान मेटिनेछ।
आइतबार शान्तिपूर्ण प्रदर्शनको तयारीमा रहेका आन्दोलनकारीमाथि प्रहरीले हस्तक्षेप गरेपछि झडप चर्किएको हो। आन्दोलनकारीले प्रयोग गरिरहेका सामग्री नियन्त्रणमा लिन खोज्दा प्रहरी र प्रदर्शनकारीबीच दिनभर झडप भएको थियो।
शान्तिपूर्ण आन्दोलनमा बल प्रयोगको आरोप
किराँत याक्थुङ चुम्लुङकी महासचिव निरन्ती तुम्बापोले राज्यले शान्तिपूर्ण विरोधलाई दबाउन बल प्रयोग गरेको आरोप लगाएकी छन्। उनले भनिन्, ‘शान्तिपूर्ण विरोध गर्न जुटेका साथीहरूमाथि राज्यले ताकेर गोली चलाएको छ, दुईजना साथीहरू गम्भीर अवस्थामा हुनुहुन्छ।’
झडपका क्रममा सुरक्षाकर्मीले अश्रुग्यास प्रहार गर्नुका साथै प्रदर्शनकारीमाथि बल प्रयोग गरेको थियो। पहिचान पक्षधरहरूले आफ्नो आन्दोलन जारी राख्ने बताएका छन्।
स्थिति अझै संवेदनशील
ताप्लेजुङमा सुरक्षा व्यवस्था कडा पारिएको छ। स्थानीय प्रशासनले सबै पक्षलाई शान्तिपूर्ण संवादका लागि आग्रह गरे पनि दुवै पक्षबीच तनाव कायम रहेको छ। केवलकार निर्माणका कारण उत्पन्न विवाद समाधानका लागि सहमतिको प्रयास आवश्यक देखिएको छ।
