नीलोपाटी संवाददाता
झापा, १० कात्तिक । झापा जिल्लाको शिवसताक्षी नगरपालिका–९ स्थित बैसबारी क्षेत्रको माईखोलाको बीच भागमा एक अन्दाजी ५५/५६ वर्षीय पुरुषको शव फेला परेको छ। स्थानीय बासिन्दाले आज अपराह्न ४:५० बजे शव देखेपछि इलाका प्रहरी कार्यालय झिलझिलेलाई जानकारी गराएका थिए।
प्रहरीका अनुसार मृतक पहाडे मूलका मंगोलियन अनुहार भएका व्यक्ति हुन्, जसको नाम, थर तथा वतन हालसम्म खुल्न सकेको छैन। उनी कम्मरभन्दा तल कालो रंगको ट्रायकसुट मात्र लगाएको अवस्थामा फेला परेका थिए।
घटनाको जानकारी प्राप्त भएपछि ईप्रका झिलझिलेबाट प्रहरी निरीक्षकको कमाण्डमा टोली घटनास्थलमा खटिएको थियो। हाल शवको पहिचान, घटनाको कारण र अन्य कानुनी प्रक्रिया सम्बन्धमा अनुसन्धान भइरहेको प्रहरीले जनाएको छ।
