नीलोपाटी संवाददाता
सुरेन्द्र खरेल, निलोपाटी
कोशी प्रदेशका अलैँची किसानहरू विभिन्न रोग र कीराका सङ्क्रमणका कारण समस्यामा परेका छन्। यो समस्याको समाधान खोज्न र किसानलाई प्राविधिक सहयोग पुर्याउन नेपाल व्यवसायी अलैँची महासङ्घका प्रतिनिधिहरू विज्ञ समूहसहित बगानमा पुगेका छन्।
अलैँची महासङ्घका महासचिव नारायणप्रसाद चिमोरियाका अनुसार, कोशी प्रदेश सरकार र अलैँची महासङ्घको पहलमा किसानका समस्याबारे गहिरो अध्ययन भइरहेको छ। अलैँचीको गुणस्तरीय उत्पादन, रोग नियन्त्रण र बजारीकरणसम्बन्धी जानकारी प्रदान गर्नका लागि कार्यक्रमहरू सञ्चालन गरिएको छ।
यस कार्यक्रमअन्तर्गत कृषि विज्ञ, प्राविधिक र सरोकारवालासँगको बैठकका माध्यमबाट बगानका समस्याहरू पहिचान गरिएको छ र समाधानका उपायहरू सुझाइरहेका छन्। साथै, किसानहरूलाई आवश्यक प्राविधिक ज्ञान दिनुपर्ने कुरामा जोड दिइएको छ।
अलैँची उत्पादनको घट्नो र रोगको सङ्क्रमणले किसानहरूको मनोबल गिराउन थालेपछि, व्यावसायिक अलैँचीखेतीमा संलग्न किसानहरूको समस्या पहिचान गर्न भोजपुरको टेम्केमैयुङ गाउँपालिका–५ चोलन्तीमा विशेष कार्यक्रम सञ्चालन गरिएको छ। नेपाल अलैँची व्यावसायिक महासङ्घका अध्यक्ष निर्मल भण्डारीले भन्नु भएको छ, “अलैँचीमा देखिएका विभिन्न समस्याका कारण धेरै किसानका बगान नष्ट भएका छन्। हामीले तिनीहरूलाई स्थलगत रूपमा आवश्यक ज्ञान दिँदै समस्या समाधानका उपायहरू प्रस्तुत गरिरहेका छौँ।”
कोशी प्रदेशका नौ जिल्लाका किसानहरूको समस्यामा ध्यान दिनका लागि यो अभियान अघि बढाइएको छ। यसका माध्यमबाट किसानलाई अधिक उत्पादन र गुणस्तरीय अलैँची उत्पादनमा मद्दत पुर्याउने उद्देश्य राखिएको छ।
